„კითხვის დრო ინგასთან ერთად“ მწვანე კონცხის დაწყებით სკოლაში
2019 წლის 10 ოქტომბერს აკაკი წერეთლის სახელობის ქალაქ ბათუმის საჯარო ბიბლიოთეკის დირექტორმა ქალბატონმა ინგა გოგიბერიძემ გასვლითი შეხვედრა გამართა და პროექტ „კითხვის დრო ინგასთან ერთად“ ფარგლებში დაბა მახინჯაურის №1 საჯარო სკოლისაკენ გაეშურა. ალბათ ყველამ არ იცის რომ ამ საჯარო სკოლას, მწვანე კონცხის ულამაზეს სოფელში, დაწყებითი სკოლა ჰყავს შვილად და მას ქალბატონი ცირა ქობულაძე ხელმძღვანელობს. პატარებმა დიდი სიყვარულით მოისმინეს გურამ პეტრიაშვილის ზღაპარი ,,პეპელა’’ და მეზღაპრეს აღუთქვეს რომ ამავე ზღაპრის პერსონაჟების ნახატებით აუცილებლად ესტუმრებოდნენ ბათუმის საჯარო ბიბლიოთეკას.
