2019 წლის 20 სექტემბერს, 17 საათზე აკაკი წერეთლის სახელობის ქალაქ ბათუმის საჯარო ბიბლიოთეკაში საქართველოს მწერალთა კავშირის აჭარის ორგანიზაციის თავმჯდომარის, პოეტ დავით თედორაძის 70 წლის იუბილესთან დაკავშირებული შემოქმედებითი საღამო-„მელაპარაკე ქართულად…“ ჩატარდა.
ბიბლიოთეკის ძირითადი საცავისა და პერიოდის განყოფილებამ გამოფინა ბატონი დავითის ყველა კრებული, ჟურნალ „ ჭოროხის“ პირველი გამოცემები, მისი პოეზიის ხელნაწერები და ასევე აჭარაში მოღვაწე თანამედროვე მწერლების სხვადასხვა წლებში გამოცემული წიგნები.
საღამო ძირითადად ბატონი დავით თედორაძის შემოქმედების განხილვას დაეთმო. მწერლებმა შოთა ზოიძემ, ბელა ქებურიამ,ცისანა ანთაძემ , ვახტანგ ღლონტმა, სანდრო ბერიძემ და ასოცირებულმა პროფესორებმა შორენა მახაჭაძემ, თინა შიოშვილმა დეტალურად ისაუბრეს ბატონი დავითის შემოქმედებით გზაზე. აჭარის ა/რ განათლების, კულტურისა და სპორტის მინისტრის მოადგილე, ბატონმა ბადრი ნაკაშიძემ, ბათუმის საჯარო ბიბლიოთეკის დირექტორმა ქალბატონმა ინგა გოგიბერიძემ და დამსწრე საზოგადოებამ განსაკუთრებულად მიულოცეს გამოჩენილ მწერალსა და საზოგადო მოღვაწეს იუბილე და სამახსოვრო საჩუქრებიც გადასცეს.
